ភ្នំពេញ៖ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជាបាន ថ្កោលទោសចំពោះការវាយប្រហារទីតាំងស្ដុកប្រេងមួយកន្លែងក្នុងទីក្រុងអាប៊ូដាប៊ី ចក្រភពអារ៉ាប់រួម ដែលធ្វើបាត់បង់ជីវិតជនស៉ីវិលនិងរងការខូចខាតទ្រព្យសម្បត្តិ៊។

អ្នកនាំពាក្យក្រសួងការបរទេសបានលើកឡើងដោយចាត់ទុកការវាយប្រហារនេះជាទង្វើគួរឱ្យស្អប់ខ្ពើម និងបានអំពាវនាវឱ្យបញ្ឈប់នូវរាល់សកម្មភាពហិង្សាដែលធ្វើឱ្យប៉ះពាល់ដល់សន្តិភាព ស្ថិរភាព និង សន្តិសុខនៅក្នុងតំបន់ និងដល់អាយុជីវិតជនស៊ីវិល។

គួររំលឹកថា កាលពីថ្ងៃច័ន្ទដើមសប្ដាហ៍នេះ យន្តហោះគ្មានមនុស្សបើកដែលអះអាងដោយក្រុមឧទ្ទាម Houthi របស់ប្រទេសយេម៉ែន បានបើកបុកទៅលើរោងចក្រប្រេងដ៏សំខាន់មួយក្នុងទីក្រុង អាប៊ូដាប៊ី ធ្វើឱ្យមានការផ្ទុះឆេះយ៉ាងសន្ធោសន្ធៅនៅអាកាសយានដ្ឋានអន្តរជាតិ Abu Dhabi និងបានសម្លាប់មនុស្ស៣នាក់ និងបង្កររបួសដល់មនុស្ស ៦នាក់៕